IPL 2025 mein Sunrisers Hyderabad (SRH) ki journey ek high note se shuru hui thi – lekin ab team chaar matches lagataar haar chuki hai. Latest defeat Gujarat Titans (GT) ke against aayi, jahan Hyderabad sirf 7 runs se match haar gaya. Opening match mein record tod total banane ke baad SRH ke top order – Travis Head, Abhishek Sharma aur Ishan Kishan – consistent perform nahi kar pa rahe.
Coach Daniel Vettori ne post-match press conference mein bola ki team ka approach galat nahi hai, lekin players ko conditions aur opposition ki bowling ko samajhna padega.
“Mujhe lagta hai hum sabko pata hai ki hamara aggressive style kaam karega, lekin humein conditions ka respect karna padega aur situation ko ache se assess karna padega – jo hum ab tak nahi kar paaye hain,” Vettori ne kaha.
“Saath hi, doosri teams hamare top-3 ke against planning karke aa rahi hain aur wo apne plans ko execute bhi kar rahi hain – jiska humein abhi tak jawab nahi mila,” unhone joda.
Bowling bhi ban gayi concern
Vettori ne sirf batting nahi, balki bowling performance par bhi sawal uthaye. Unka kehna hai ki pichhle season se hi bowling consistent nahi rahi hai.
“Hum ek complete game nahi khel pa rahe hain. Last season humne bade scores banaye the aur fir ball se mushkil se bach rahe the. Ab na scores aa rahe hain, na bowling click kar rahi hai,” Vettori ne kaha.
“Achhi baat yeh hai ki IPL mein quick turnarounds hote hain. Har match ek nayi opportunity hai. Individual performances aa rahi hain, lekin ab team ko collective effort dikhana padega,” unhone add kiya.
SRH bottom pe, agla match bhi home ground pe
SRH abhi points table ke bilkul neeche hai – sirf 1 win in 5 games. Ab team ke paas thoda waqt hai strategize karne ka pehle ki wo 12 April ko Punjab Kings (PBKS) ke against home ground pe khelegi.
SRH fans ke liye umeed ki kiran yeh hai ki team ke paas potential hai, sirf usse consistent performance mein badalne ki zarurat hai. Travishek ko Vettori ka message clear hai – ab bas execution ki baari hai!
