IPL 2025 ke ek zabardast mukable mein Rajasthan Royals (RR) ko Royal Challengers Bengaluru (RCB) ke haathon sirf 11 runs se haar ka samna karna pada. Match Bengaluru ke M. Chinnaswamy Stadium mein khela gaya, jahan RCB ne iss season ki pehli jeet haasil ki.
Lekin spotlight chura le gaye Vaibhav Suryavanshi, jinhone sirf do matches mein hi apne batting skills se sabka dil jeet liya. Debut match mein Lucknow Super Giants (LSG) ke against unhone pehli ball par hi chhakka jadka diya. 20 balls mein 34 runs, jisme 2 boundaries aur 3 bade sixes shamil the. Dusre match mein bhi form barkarar rahi, jab unhone experienced bowler Bhuvneshwar Kumar ko do chakke laga diye.
Lekin India ke former cricketer Virender Sehwag ne Suryavanshi ko ek kadak advice di hai – “Fame ka nasha chhota hota hai, consistency ka plan banao!”
“Agar aap ye sochkar khelne jaate ho ki accha kheloge to tareef milegi aur bura kheloge to criticism, to aap zameen par rahoge. Maine bahut players dekhe hain jo ek-do match khel kar hi star ban jaate hain aur phir kuch nahi karte.”
Sehwag ne compare kiya Suryavanshi ko Virat Kohli se, aur unko long-term vision rakhne ki salah di:
“Suryavanshi ko IPL mein 20 saal khelne ka lakshya banana chahiye. Dekho Kohli ko – 19 saal ki age mein shuru kiya aur har ek season mein khele. Agar Suryavanshi soche ki pehle match mein chhakka mara, paisa kama liya, to ho sakta hai agle saal na dikhein.”
Ab sabki nazar Vaibhav Suryavanshi par hogi jab RR ka agla mukabla Gujarat Titans (GT) ke khilaf April 28 ko Sawai Mansingh Stadium, Jaipur mein hoga. Kya wo ek aur dhamaka karenge ya Sehwag ki advice unko aur behtar banayegi? Yeh dekhna hoga!
