IPL 2025 mein drama kam nahi ho raha! Manoj Tiwary, jo KKR ke IPL 2012-winning team ka hissa the, ne Punjab Kings (PBKS) ke head coach Ricky Ponting par foreign players ko favour karne ka ilzaam lagaya hai. Unka kehna hai ki Ponting bharatiya players jaise Nehal Wadhera aur Shashank Singh par bharosa nahi karte.
KKR ke against Eden Gardens mein hue match mein, jab Punjab Kings ko tezi se runs ki zarurat thi, toh instead of in-form Indian batters, Ponting ne Glenn Maxwell, Marco Jansen aur Josh Inglis jaise foreign players ko bheja – aur result? Total flop show!
“Mera gut feeling keh raha hai ki Punjab team is season IPL trophy nahi jeet payegi. Jo maine batting ke dauraan dekha, waha coach ne in-form Indian batters Nehal Wadhera aur Shashank Singh ko nahi bheja, balki foreign players pe bharosa kiya, jo fail ho gaye. Agar Ponting aise hi chalte rahe, toh title door ka sapna ban jayega,” – Manoj Tiwary ne X par likha.
Match ka scene kuch aisa tha: PBKS ke openers Priyansh Arya aur Prabhsimran Singh ne zabardast start diya, 120-run ki partnership. Priyansh ne 35 balls par 69 run banaye, aur Prabhsimran ne 83 runs thok diye 49 balls mein. Lekin jaise hi Prabhsimran out hue, sab gadbad ho gaya.
Ponting ne out-of-form Maxwell ko bheja, jo bas 7 runs bana paaye. Uske baad Marco Jansen aaye, sirf 3 runs. Phir Josh Inglis aaye, 11 runs. Iss bekaar strategy ke wajah se PBKS sirf 201/4 ka score kar paya, jabki starting itni dhamakedar thi. Baaki ke 33 balls mein sirf 41 runs bane!
Match mein rain ne bhi apna role play kiya. Sirf ek over ke baad hi baarish aa gayi, aur dono teams ko ek-ek point mil gaya. Abhi PBKS points table mein chauthi position par hai, 9 matches mein 5 wins ke saath.
Ab dekhna yeh hoga ki kya Ponting apni strategy badalte hain, ya phir Punjab ka IPL 2025 ka sapna isi tarah bikhar jayega?
