New Delhi: Arun Jaitley Stadium ki slow pitch par RCB opener Virat Kohli ne ek baar phir dikhaya ki experience aur cricketing sense ka koi substitute nahi hota. Powerplay ke baad jab team ne quick wickets lose kiye, tab Kohli ne Krunal Pandya ke saath milke innings ko sambhala aur match jeetne tak le gaye.
Krunal ke saath unki 119-run ki crucial partnership ne Delhi Capitals ke haath se match chheen liya. Iske baad Tim David ne Mukesh Kumar ke ek over mein hi kaam khatam kar diya. Post-match interview mein Kohli ne strike rate critics ko classy tarike se jawab diya.
“Main scoreboard, pitch aur bowlers ka analysis karta hoon. Singles-doubles ka flow rokna nahi chahiye, usi beech mein agar ek-do boundary mil jaaye toh game moving rehta hai. Aajkal log bhool rahe hain ki T20 mein depth aur partnerships ka bhi importance hota hai. Har match mein ball one se aggressive hona zaroori nahi hota.”
“Professionalism chahiye situation ko samajhne ke liye. Agar pitch slow hai aur aap strike rotate nahi kar paate, toh domination mushkil ho jata hai. Mera approach hamesha calculated rehta hai.”
Kohli ne Krunal Pandya ke awareness aur communication ko bhi appreciate kiya:
“Krunal baar-baar bol raha tha ki main tikun crease par, woh apne shots le lega. Tim David aur Jitesh jaise finishers aur ab Romario bhi hai – toh end tak agar set batter tik jaaye, toh game hamare favour mein chala hi jata hai.”
IPL 2025 mein Kohli ki performance:
- Runs: 443 (10 innings)
- Average: 63.29
- Strike Rate: 138.87
- Half-centuries: 6
- Latest knock vs DC: 51 runs off 47 balls (4 fours)
Is performance ke baad unhone Orange Cap bhi haasil kar liya, MI ke Suryakumar Yadav ko piche chhodte hue. Kohli ne ek baar phir sabit kiya ki smart cricket is still king in T20s!
