IPL 2025 mein Chennai Super Kings (CSK) ki halat kaafi kharaab rahi hai, aur is baar unki team selection strategy par India ke legendary spinner Harbhajan Singh ne zabardast fire kiya hai. Unhone khud CSK ke former player hone ke bawajood management ko aade haath le liya.
Ravichandran Ashwin, jise CSK ne ₹9.75 crore mein auction ke dauraan kharida tha, unhe sirf 7 matches mein mauka diya gaya, jisme unhone sirf 5 wickets liye. Harbhajan ka kehna hai ki agar itne bade amount se kisi player ko liya gaya hai, toh usse bench par bithana ‘strategy fail’ ka saboot hai.
“Chennai ne pitch conditions ke hisaab se team select nahi ki. Agar Noor Ahmad, Ashwin aur Jadeja Punjab ke against khelte, toh match CSK jeet sakti thi. Aapne usse ₹10 crore dekar bench par bithane ke liye nahi kharida tha. Pata nahi kis se jhagda ho gaya hai uska,” Harbhajan ne JioHotstar par kaha.
CSK is waqt IPL 2025 ke points table mein sabse neeche hai – sirf 2 jeet aur 8 haar ke saath. Harbhajan ne yeh bhi highlight kiya ki aur bhi players hain jinhone kuch khaas nahi kiya, fir bhi woh team mein bane hue hain. Lekin Ashwin ko consistently ignore kiya gaya.
“Woh akela nahi hai jiska performance weak raha hai. Dusre bhi average khel rahe hain par fir bhi team mein hain. Ashwin ko toh Punjab ke against zaroor khelna chahiye tha, ball spin ho raha tha,” unhone joda.
Agla match CSK vs RCB hone ja raha hai 3 May ko M. Chinnaswamy Stadium, Bengaluru mein. Jahan RCB playoff race mein mazbooti se bani hui hai, wahi CSK ko apni izzat bachane ki ladaai ladni hogi. Kya Dhoni-led CSK kuch badlav karegi, ya phir bench par baitha Ashwin iss season ke baaki matches bhi miss karenge?
