IPL 2025 ke ek aur dil-thaam ke rakh dene wale match mein, Rajasthan Royals sirf 1 run se Kolkata Knight Riders ke khilaaf haar gayi. Lekin sabse bada highlight bana Riyan Parag ka honest confession. Stand-in captain Parag ne post-match presentation mein kaha ki unki galat batting strategy ne hi team ko jeet se door kar diya.
Chasing a massive 207-run target, RR ki umeedein tikki thi Parag ke explosive 95-run knock par, jo unhone sirf 45 balls mein banaya. Lekin jab wo 18th over mein out hue, to game ka pura momentum shift ho gaya. RR ke liye match jeetna mushkil ho gaya, chahe Shubham Dubey ne last over mein kuch dhamakedar hits zarur kiye.
“Main soch raha tha ki last 2 overs tak crease par rahunga, par 18th over mein out ho gaya. Ye meri taraf se ek miscalculation tha. Hume aakhri 6 overs mein aur better bowling options dhoondhne chahiye the. Galti humari hi thi, kisi aur ko blame nahi kar sakte. Hume match khatam kar dena chahiye tha. Hindsight mein aur options soch sakte the. Russell 10 balls pe 2 runs par tha, uske baad jis tareeke se usne accelerate kiya, dekhke maza aaya. Pitch tricky thi, toh mujhe apne battles pick karne pade. Mujhe lagta hai maine theek kiya, jab tak out nahi hua. Par honestly, aaj losing captain ke roop mein interview dena ajeeb lag raha hai. Fielding mein bhi hum clinical nahi the aur uske consequences saamne hai,”
KKR ki taraf se Andre Russell, Rinku Singh aur youngster Angkrish Raghuvanshi ne zabardast batting ki, jisse unhone 206 ka total khada kiya. Rajasthan ke liye chase tough tha, lekin Parag ne usse possible banaya, jab tak wo out nahi hue.
Match ka sabse dramatic moment aaya last ball par, jab RR ko chahiye the sirf 3 runs. Dubey ne koshish ki second run ke liye, lekin Rinku Singh ke ek lightning-fast throw ne Jofra Archer ko run-out kar diya aur KKR ko jeet mil gayi ek run se.
Ab RR ki next clash hai May 12 ko Chennai Super Kings ke khilaaf, MA Chidambaram Stadium mein. Dekhna hoga ki Parag aur unki team is heartbreak se kaise bounce back karti hai.
